وش موت جديد | عمرو إبراهيم

أحلى الكلام سال من جفونك وقت بعدى لحظة ما سيبتك وسط سيل م اﻷمنيات مقدرتش أفضل و أوفى ليكى بشئ ف وعدى و لا قادر أرجع أصحى فيكى الذكريات

لحظة فراقنا كات عصيبة الدنيا سودة مغيمة و ف لحظة حسيتك قريبة و الصمت حالة مخيمة

فحضنت عينك من سكات نزلت دموع متألمة بتلومنى على كل اللى فات راحت أوام متكلمة

و قالتلى فاكر حبنا كأن أحلى قصة فى حينا فاكر دموعى فى شدتك و حنينى حتى ف ضمتك فاكر قصيدتك من سنة كانت وثيقة ف عشقى أنا فاكر وعودك و اﻷمال لما احنا سمينا العيال

كان نفسى جدا إنى أموت و لا إنى إسيبك وقت خوفك و ﻷنى أصلا وش موت ضميت بعزمى براح كفوفك

و مشيت بعيد من غير ما أقولك إيه السبب سيبتك بجهلك فى الحياة ساعة ما فتحتلى الترب ﻷجل إنى أموت أنا قلبى مجبر ع السكوت تعبان و مفتوحله التابوت و كمان سنة و لازم يموت

كان لازم أبعد من سكات كان بعدى أهون من صراحتى و الليله أنا ملك الممات هرتاح فى موتى لو سامحتى !!